Санхүүгийн Зохицуулах Хорооны 2017 оны 11 сарын 24-ний өдрийн 225 тоот тогтоолоор “Хөрөнгө Оруулагч Үндэстэн” хаалттай хувьцаат компани нь Монголын Хөрөнгийн Биржид бүртгэлтэй “Жинст Увс” ХК-тай нэгдэж  нээлттэй хувьцаат компани болсон бөгөөд өнөөдөр уг компанийн арилжааны нээлт болон цан цохих үйл ажиллагаа болж өнгөрлөө. Цан цохих үйл ажиллагаанд МХБ-ийн Гүйцэтгэх захирал Х.Алтай, “Хөрөнгө Оруулагч Үндэстэн” ХК-ийн ТУЗ-ийн дарга Ч.Ганхуяг болон  “Хөрөнгө Оруулагч Үндэстэн” ХК-ийн Гүйцэтгэх захирал Б.Тамир нар оролцож, МХБ-ийн 5,620 дахь арилжааг эхлүүлж хүндэтгэлийн цанг цохилоо.

“Хөрөнгө Оруулагч Үндэстэн” ХК нь 2016 оны 1 дүгээр сард 560 хүний санаачлагаар Монголд анх удаа “crowdfunding” /олон нийтээс хөрөнгө татан төвлөрүүлэх/ аргыг ашиглан олон нийтийн оролцоотой арилжааны банк байгуулах зорилгоор үүсгэн байгуулагдсан мэргэжлийн санхүү, хөрөнгө оруулалтын компани бөгөөд өдгөө 900 гаруй үндэсний хөрөнгө оруулагч иргэд, аж ахуйн нэгжийг эгнээндээ нэгтгээд байна. Хөрөнгө Оруулагч Үндэстэн нь Ард Санхүүгийн Нэгдлийн 7 орчим хувийг эзэмшдэг бөгөөд цаашид Ард Санхүүгийн Нэгдэлтэй хамтран Монголын банк санхүүгийн салбарыг дэлхийн цахим хувьсгалд хамруулах зорилготой ажиллаж байгаа тухайгаа нээлтийн үеэр мэдэгдлээ.

МОНГОЛЫН ХӨРӨНГИЙН БИРЖ