“Монголын хөрөнгийн бирж” ТӨХК, Төрийн өмчийн хороо болон Лондонгийн хөрөнгийн бирж группын хооронд байгуулсан стратегийн хамтын ажиллагааны “Ажлын мастер гэрээ”-ний хүрээнд хөрөнгийн зах зээлийн шинэчлэлийн ажлуудыг тодорхой үе шаттайгаар амжилттай хэрэгжүүлж байна.

“Монголын хөрөнгийн бирж” ТӨХК 2012 оны 7 дугаар сарын 2-ны өдөр арилжаа, төлбөр тооцоо, хяналтын цогц шийдэл бүхий “Mиллениум Ай Ти” системийг амжилттай нэвтрүүлсэн билээ. Шинэ систем болон хууль, эрх зүйн актаар тавигдаж буй шаардлагуудыг бүрэн хангасан 44 брокер, диллерийн компани өнөөдөр хөрөнгийн зах зээлийн арилжаанд оролцож байгаа бөгөөд олон жилийн дунджаас харахад эдгээр брокер, дилерийн компаниуд зах зээлийн нийт арилжааны 95 гаруй хувийг бүрдүүлж байна.

Энэ оны эхний 9 сарын байдлаар нийт 142.4 тэрбум төгрөгийн арилжаа хийгдсэн нь өмнөх оны мөн үетэй харьцуулахад 81.3 тэрбум төгрөгөөр буюу 2.3 дахин их, харин 2011 оны жилийн эцсийн үзүүлэлттэй харьцуулахад 33.4 тэрбум төгрөгөөр буюу 1.3 дахин өссөн байна.

2012 оны эхний хагас жилийн байдлаар нийт 61 тэрбум төгрөгийн хувьцааны арилжаа хийж, өдрийн дундаж арилжааны хэмжээ 463 сая төгрөг байсан бол 2012 оны 7 дугаар сарын 2-ны өдрөөс буюу шинэ системийг ашиглалтанд оруулсан өдрөөс өнөөдрийг хүртэл 81.5 тэрбум төгрөгийн үнийн дүн бүхий хувьцааны арилжаа хийгдэж, өдрийн дундаж арилжааны хэмжээ 1.4 тэрбум төгрөгт хүртлээ өссөн үзүүлэлттэй байна.

ХӨРӨНГИЙН ЗАХ ЗЭЭЛИЙН АРИЛЖААНЫ СУДАЛГАА