БНСУ-ын хөрөнгийн зах зээлийн хөгжлийг манлайлан ирсэн БНСУ-ын шилдэг үнэт цаасны компани болох KDB Дэү Секьюритис ХХК-ийн төлөөлөгчид өнөөдөр буюу 2015 оны 6 дугаар сарын 26-ны өдөр Монголын хөрөнгийн биржид зочиллоо.
Энэ өдөр Монголын хөрөнгийн биржийн 5007 дахь удаагийн үнэт цаасны арилжаа тохиож нээлтийг KDB Дэү Секьюритис ХХК-ийн Тэргүүн дэд захирал Ли Сам Гю “Цан” цохин эхлүүллээ.
Тус компанийн Монгол дахь салбар нь 2013 оны 6 сард байгуулагдсанаас хойш гадаадын зах зээл дээрх арилжигдаж буй Монгол улсын бондын арилжаа (Одоог хүртэл 5 сая долларын арилжаа), Монгол улсын “хадгаламж болон долларын бонд”-д суурилсан санхүүгийн бүтээгдэхүүнийг гадаадын зах зээл (өнөөг хүртэл 45 сая доллар орчим арилжаа) дээр арилжах үйл ажиллагааг Монголд анх удаа нэвтрүүлсэн зэргээр Монгол улсын хөрөнгийн зах зээлийн хөгжлийн төлөө хувь нэмрээ оруулж буй бөгөөд ялангуяа ЗГҮЦ-ны арилжааг идэвхижүүлэх талаар хөрөнгийн бирж болон холбогдох байгууллагуудтай идэвхи чармайлттай харилцан ажиллаж, 2014 оны 11 сард ЗГҮЦ-ны арилжаа хөрөнгийн биржээр арилжигдаж эхэлснээс хойш Солонгосын хуулийн этгээдүүд болон хувь хүмүүсийг идэвхитэй зуучилж байна. Цаашид ч Солонгосын хөрөнгө оруулагчид ЗГҮЦ-нд хөрөнгө оруулах сонирхол их байгааг онцлоод, Монголын хөрөнгийн биржид илүү их хөрөнгө оруулагчдыг зуучлах хүсэлтэй байгаагаа илэрхийлсэн юм.
