Санхүүгийн зохицуулах хорооны ээлжит хуралдаанаар 2014 оны 06 дугаар тогтоолоор батлагдсан Үнэт цаасны бүртгэлийн журамд өөрчлөлт оруулжээ.
Өрийн удирдлагын тухай хууль батлагдсанаар Санхүүгийн зохицуулах хороо Засгийн газрын өрийн хэрэгслийг бүртгэх эрх зүйн зохицуулалтад өөрчлөлт орж Засгийн газрын өрийн хэрэгсэл гаргахыг батлах эрх УИХ-д, аймаг нийслэлийн Засаг даргын өрийн хэрэгсэл гаргахыг батлах эрх аймаг, нийслэлийн ИТХ-д тус тус шилжсэн юм. Иймд Засгийн газар, аймаг, нийслэлийн Засаг даргын гаргасан өрийн хэрэгсэл бүртгэхтэй холбоотой харилцааг зохицуулдаг Үнэт цаасны бүртгэлийн журмын холбогдох хэсгийг хүчингүй болгосон байна.
Мөн Үнэт цаасны бүртгэлээс хасагдаж буй хувьцаат компани жижиг хувьцаа эзэмшигчдийн эзэмшиж буй хувьцааг эргүүлэн худалдаж авахад шаардагдах мөнгөн хөрөнгийг “ҮЦТТТХТ” ХХК-ийн дансанд Хорооны шийдвэр гарахаас өмнө байршуулсан байх зэрэг зохицуулалтыг уг журамд оруулж өгсөн байна. Учир нь хувьцааг бүртгэлээс хасахад жижиг хувьцаа эзэмшигчдийн эрх тодорхой хэмжээгээр зөрчигддөг бөгөөд Компанийн тухай хуульд зааснаар хувьцаагаа эргүүлэн худалдаж авахыг шаардах эрхтэй боловч уг эрхийн хэрэгжилт бодит амьдрал дээр дутмаг байгааг энэхүү өөрчлөлтөөр нарийвчлан зохицуулсан байна. Ингэснээр жижиг хувьцаа эзэмшигчдийн өмнө компанийн хүлээх үүргийн хэрэгжилт хангагдахаас гадна ногдол хувийн төлбөрийг байршуулсны дараа үнэт цаасыг бүртгэлээс хасдаг болох юм.

 

Эх сурвалж: Санхүүгийн зохицуулах хороо

 

Маркетинг, олон нийттэй харилцах алба

МОНГОЛЫН ХӨРӨНГИЙН БИРЖ