“Монголын хөрөнгийн бирж” ХК, Санхүүгийн зохицуулах хороо, Үнэт цаасны төвлөрсөн хадгаламжийн төв (ҮЦТХТ) ХХК болон Монголын үнэт цаасны арилжаа эрхлэгчдийн холбоо (МҮЦАЭХ) хамтран “Хөрөнгийн зах зээл ба 1072 хувьцаа” үнэт цаасны зах зээлийн нээлттэй өдөрлөгийг Төвийн бүсийн аймгуудад зохион байгуулж байна.
Өнөөдөр (2025.10.20) Сэлэнгэ аймгийн төв Сүхбаатар хотоос Төвийн бүсийн өдөрлөгийг эхлүүлсэн ба энэхүү үйл ажиллагааг Сэлэнгэ аймгийн засаг даргын орлогч Ж.Сайнцог нээж үг хэллээ.
Өдөрлөгийн хүрээнд Санхүүгийн зохицуулах хорооны Гадаад харилцаа, хамтын ажиллагааны газрын Санхүүгийн боловсрол, сургалтын албаны мэргэжилтэн Э.Өлзийсайхан "Санхүүгийн боловсрол" сэдвээр дэлгэрэнгүй мэдээлэл хүргэсэн.
Түүнчлэн "Монголын хөрөнгийн бирж" ХК-ийн МОНХА-ны ахлах мэргэжилтэн П.Нямдорж Хөрөнгийн зах зээлийн үндсэн ойлголт, мөн МУ-ын Засгийн газрын шийдвэрээр 1991 онд өмч хувьчлалын эрхийн бичиг хэлбэрээр иргэдэд олгогдсон цэнхэр, ягаан тасалбартай холбоотой мэдээлэл өгсөн юм.
Үйл ажиллагааны төгсгөлд Сэлэнгэ аймагт тогтвортой үйл ажиллагаа явуулж буй “Гүүдсек ҮЦК” ХХК-ийн захирал У.Энхтайван хөрөнгийн зах зээлд иргэд хэрхэн хөрөнгө оруулалт хийх боломжтой талаар танилцуулга мэдээлэл өгөхийн зэрэгцээ Сэлэнгэ аймагт үйл ажиллагаа явуулдаг томоохон аж ахуйн нэгжүүдэд зориулсан “Олон нийтээс санхүүжилт татах боломжууд” сэдэвт сургалт явууллаа.
Тус өдөрлөгөөр:
-
Хөрөнгө оруулалт, хөрөнгийн зах зээлийн үндсэн ойлголт өгөх сургалт
-
1072 хувьцааны бүртгэл, ногдол ашиг,
-
Баялгийн шударга хуваарилалтын талаар
-
Цэнхэр, ягаан тасалбар болон иргэдийн эзэмшиж буй хувьцааны бүртгэл, мэдээллийг шүүж өгөх,
-
Зах зээлд гарч байгаа шинэ бүтээгдэхүүн үйлчилгээг танилцуулах болон үнэт цаас гаргагчдад зөвлөгөө өгөх хөрөнгө оруулагчдыг бэлтгэх, макро эдийн засгийн өнөөгийн нөхцөл байдал сэдвийн хүрээнд оролцогчдод дэлгэрэнгүй мэдээлэл хүргэхийг зорьсон.
Өдөрлөгт нийт 410 орчим иргэд хамрагдсан бөгөөд 220 орчим иргэн “Үнэт цаасны төвлөрсөн хадгаламжийн төв’ ХХК-иар дамжуулан цэнхэр ягаан тасалбарын талаарх мэдээллээ шүүлгэлээ.
“Хөрөнгийн зах зээл ба 1072 хувьцаа” үнэт цаасны зах зээлийн нээлттэй өдөрлөг ирэх өдрүүдэд Дархан-Уул, Орхон, Булган, Хөвсгөл аймгуудад үргэлжилнэ.
Видео мэдээлэлтэй энд дарж танилцана уу.
МОНГОЛЫН ХӨРӨНГИЙН БИРЖ