Өнөөдөр /2025.05.20/ Сангийн сайд Б.Жавхлан болон “Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн, Уул уурхайн бүтээгдэхүүний арилжаа, бүртгэлийн газрын захирал С.Ариунсанаа нар биржийн байранд уул уурхайн бүтээгдэхүүний биржийн арилжааны гол худалдан авагч төр, хувийн компанийн төлөөллүүдийг хүлээн авч уулзлаа.

Оролцогчдын зүгээс нүүрсний үнийн уналт, тодорхойгүй байдлын улмаас худалдан авагчдад үүссэн хүндрэлийн талаар танилцуулсан бол талууд биржийн арилжааг идэвхжүүлэх боломжийн талаар харилцан санал солилцсон.

Түүнчлэн "Уул уурхайн бүтээгдэхүүний биржийн тухай" хуулийн нэмэлт, өөрчлөлтийн ач холбогдлын талаар ярилцаж, сүүлийн 10 гаруй жил гацсан Гашуунсухайт-Ганцмод боомтын хил дамнасан төмөр замын түүхэн бүтээн байгуулалтыг эхлүүлж, хил нэвтрүүлэлтийг нэмэгдүүлэх чиглэлд хийгдэж буй бусад арга хэмжээний талаар мэдээлэл хүргэлээ.

Уулзалтад Сангийн яам, Зам тээврийн яам, Гаалийн ерөнхий газар болон "Эрдэнэс Монгол" ХХК, "Эрдэнэс Тавантолгой" ХК-ийн төлөөллүүд оролцлоо.

МОНГОЛЫН ХӨРӨНГИЙН БИРЖ