“Монголын хөрөнгийн бирж” ХК нь зах зээлийг олон улсын жишигт нийцүүлэн хөгжүүлэх стратеги төлөвлөгөөний дагуу уул уурхайн бүтээгдэхүүн болон үнэт цаасанд суурилсан үүсмэл санхүүгийн хэрэгслийг нэвтрүүлэх бэлтгэл судалгааны ажлыг хийж байна.

Үүний хүрээнд, 2024 оны 11 дүгээр сарын 7-ны өдөр МХБ-ийн төлөөлөл БНХАУ-ын Шанхайн Фьючерсийн биржид зочилж, тус биржийн үйл ажиллагаатай танилцаж, туршлагаас нь суралцлаа. Түүнчлэн, Шанхайн Фьючерсийн биржийн дэд ерөнхийлөгч Лу Фен болон Олон улсын харилцааны газрын дэд захирал Ян Юпин нартай уулзалт хийж, цаашид хамтран ажиллахаар боллоо. Тус хамтын ажиллагааны хүрээнд үүсмэл санхүүгийн хэрэгсэл нэвтрүүлэх, хөгжүүлэх, хүний нөөцийн чадавхийг сайжруулах, хамтарсан бүтээгдэхүүн, үйлчилгээ гаргах, зах зээлийг сурталчлах чиглэлээр хамтран ажиллахаар ярилцлаа.

Шанхайн Фьючерсийн бирж нь зэс, хөнгөн цагаан, цайр, алт, мөнгө зэрэг бүх төрлийн метал, газрын тос, химийн бүтээгдэхүүний фьючерс, опцион гэрээг арилжаалдаг бөгөөд үүсмэл санхүүгийн хэрэгслийн арилжаагаар БНХАУ-ын тэргүүлэгч бирж юм.

МОНГОЛЫН ХӨРӨНГИЙН БИРЖ