Та бүхэнд Монголын Хөрөнгийн зах зээл үүсч, хөгжиж Монголын Хөрөнгийн Бирж ТӨХК байгуулагдсаны 31 жилийн ойн баярын мэндийг хүргэе!

Энэхүү түүхэн хугацаанд хөрөнгийн зах зээлийн техник технологи, хууль эрх зүйн орчин олон улсын жишгийн дагуу шинэчлэгдэн сайжирч, Монголын хөрөнгийн зах зээл хөгжлийн шинэ үе дээрээ ирээд байна.

Дэлхий нийтийг хамраад буй цар тахлын улмаас Монгол Улсын эдийн засаг агшиж, хүнд бэрх сорилтуудтай нүүр тулж байгаа хэдий ч Монголын хөрөнгийн зах зээл 2021 онд маш хурдацтай өсч, зах зээлийн голлох үзүүлэлтүүд түүхэнд дээд хэмжээнд хүрлээ. Түүнчлэн, “Банкны тухай хууль”-д нэмэлт өөрчлөлт орсноор дотоодын арилжааны банкууд хөрөнгийн зах зээлд үнэт цаасаа гаргах таатай боломж нээгдээд байна. Энэхүү өсөлтийг Дэлхийн тэргүүлэх санхүүгийн судалгааны агентлаг болох Их Британийн “FTSE Russell”- группээс Монголын Хөрөнгийн зах зээлийг “Хөгжиж буй зах зээл”-ийн “Ажиглалтын жагсаалт”- нд оруулсан явдал нь олон улсын санхүүгийн зах зээлийн томоохон төлөөлөгчид Монгол Улсын хөрөнгийн зах зээлийг сонирхон, онцлоход гол түлхэц болов.

Хөрөнгийн зах зээлийн оролцогчид, мэргэжлийн байгууллагууд, үнэт цаас гаргагч болон хөрөнгө оруулагчид та бүхэндээ Монголын хөрөнгийн бирж байгуулагдсаны түүхт 31 жилийн ойн мэндийг дахин дэвшүүлье!

ГҮЙЦЭТГЭХ ЗАХИРАЛ

                                                                        Х.АЛТАЙ

 МОНГОЛЫН ХӨРӨНГИЙН БИРЖ